Despues di a ricibi Tao, con pa cuminsa cultiva Tao den bo bida diario.

Hopi hende despues di a ricibi Tao ta sinti hopi emocion, especialmente despues di a participa den e bunita ceremonia di iniciacion. Bo ta keda corda e ceremonia y bo kier haci e maximo esfuerso pa corda e Tres Tesoronan door di keda practicanan. Pero despues di algun dia e ambiente y energia di mundo y su asuntonan ta manera domina bek bo pensamentonan y bida.

Hopi ta puntra nan mes; kiko pa haci, pa bolbe sinti e mesun energia di; Paz, Harmonia, Renobacion y Speransa, manera e dia cu bo a ricibi Tao?

Mi ta desea di comparti cu boso un poco di mi experiencia. Algo importante pa cada un di nos realisa ta, cu un otro dimension di bida a habri y bira posibel pa nos experiencia. Nos tin un naturalesa 3 dimensional pero nos a custumbra biba den dos; Mente y Curpa so. Pero awor nos ta reconecta cu Cielo nos Mama-Tata Celestial y su frequencia. Esey ta algo nobo cu nos tin cu integra den nos pensamento y bida diario pa e bira gradualmente normal y hopi special cu nos lo siña aprecia paso pa paso.

Tao su Tempelnan ta e luga cu poco poco nos ta cuminsa fortalece e conexion aki, pa nos restaura e energia di nos Esencia. Mas klas y ceremonia bo atende, mas bo energia di bo Esencia ta recupera pa bo ta 3 Dimencional den bo bida diario; Curpa, Mente y Esencia. Practicando un of dos di e Tres Tesoronan algun biaha pa dia ta yuda nos pa permanence den harmonia cu nos Esencia kende ta e abo di berdad y no bo pensamentonan, emocion of memoria.

Si antes nos tawata tuma decisionnan hopi lihe y segun nos opinion, emocion of custumber, awor lo bo siña primi brake den e momento presente di bida pa reflecciona. Asina bo por evita cu emocion, preferencia of custumber ta tuma e decision pa bo.

Un dia nobo ta algo hopi special, e ta un oportunidad pa nos biba e bida den harmonia cu e contenido di bo dia. Pues no den scuridad di duda, miedo, egoismo, keho, stress y pura of custumber. Pesey e Solo ta sali na comienso di cada dia pa remove scuridad, nos tambe tin cu permiti nos Luz sali y briya nos curason y mente den cada momento pa remove duda, miedo, egoismo, keho, stress, apuro of custumber. Asina e energia di nos Esencia por recupera su forsa y presencia, nos intuicion ta cuminsa funciona natural, cu mas claridad pa yuda nos tuma decision segun berdad, asina nos FE berdadero ta crece.

Pesey cuminsa bo cultivacion cu atencion pa restaura e energia y Luz di bo Esencia prome, paso pa paso. E Tempel di Tao ta un branch (Sucursal) di Cielo na mundo, pa Dios yuda su yiunan recupera nan naturalesa original. Asina nos por sinti su amor y sabiduria den nos curason pa ilumina nos mente y progresa.