Preciosidad di a Ricibi Tao

Ora cu nos ricibi Tao, nos ta ricibi e Tres Tesoronan,  cu ta e transmision di e Dharma (Ley y Berdad Universal) mas directo di tur e transmisionnan di e Buddhanan, y e yama e Rey di tur Dharma. E Sutra di Diamante den Budismo e ta ser yama e Rey di tur Sutra pa e Dharma cu e ta contene, E curason di e Santonan di antiguedad.  Den e Sutra di Diamente tin scirbi e proceso con Buddha a transmiti Tao na Subhuti, y e comprobacion kiko Subhuti a compronde ora cu el a ricibi Tao di Buddha, asina e Sutra aki a ser forma cu ta transmiti tur e Berdadnan y e Curason di e Dharmanan.

E Preciosidad di e Tres Tesoronan (3T) ta e yabi cu ta desperta e Esencia.

Kiko ta loke nos a ricibi durante e iniciacion? Esakinan ta e Tres Tesoronan mas precioso. E Tres Tesoronan cu nos a ricibi ta manera un trasmision di forma, por ehempel, nos por mira ora cu Maestro ta toca/indica e Porta Celestial, pero e ta wordo transmiti atrabes di e forma pa nos por compronde e Dharma di Curason di e 3 T. Ricibiendo Tao pues por habri e bahul di e Esencia, cual ta contene Sabiduria y Virtudnan Infinito, e no ta caba no agota. 

E Tres Tesoronan precioso ta e yabi pa desperta e Esencia pa e por mira cu mas claridad y sabiduria pa e por cultiva y libera paso pa paso.

Por lo tanto, ora cu nos ricibi e Tres Tesoronan nos por compronde e Dharma di Curason, e Esencia por alcansa Iluminacion. Ora e Esencia ta Ilumina, esaki ta ser yama “Buddha”, si e Esencia ainda ta perdi, mientras cu e persona ainda ta bibo, e ta un ser yama un ser humano “comun y coriente”.

Ricibi Tao ta mes precioso cu e Tesoro di mas Precioso di Universo. Sinembargo, hopi cultivador di Tao kisas ainda no a logra compronde loke nan ta posee, ni nan tampoco sa con pa uza e yabi cu por habri nan Naturaleza Original.

Esaki ta mescos cu un metaforo di e Sutra, unda ta trata di un comerciante miyonario cu e deseo di cultiva y bira un monje. El a laga un tereno planta cu palonan di Ebano pa su yiu homber. Ebano ta un tipo di palo di mata masha balioso cu ta existi. El a bisa su yiu homber cu tur dia e por kita un tiki di e mata di Ebano pa bende, di e forma aki e por biba comodamente. Despues di algun aña, cu e comerciante miyonario aki a pasa bek den e pueblo unda e tawata biba y a probecha di bishita su yiu, el a keda sorprendi pa e situacion malo cu su yiu tawata biba aden. Despues cu el a puntra su yiu pakiko e ta den e situacion precario, el a haya sa cu su yiu a purba di bende e Ebano den mercado, pero cu casi ningun hende kier a cumpra, pero na e mesun momento su bisiña cu tawata bende carbon si tawata bende bon e palo di carbon. E ora e yiu di e comerciante  miyonario a purba di kima e palo di Ebano pa converti’e den carbon, cu e proposito pa mehora su benta.

E comerciante miyonario a sinti hopi duele pa su yiu homber, e ora el a bis’e:”Mi yiu, bo mester sa cu Ebano ta un tipo di palo masha valioso, y en general hende cu no conoc’e no ta bay cumpr’e, sinembargo, solamente bo mester raspa e Ebano y hasi’e bira polvo, esaki lo bira un condimento supremamente costoso y valioso. Tambe si traha un instrumento of un estatua di Buddha di dje, tambe nan lo tin hopi balor comercial.  Mi ta sinti hopi lastima cu bo a kima y bende e Ebano como si fuera e ta carbon.

Pues no considera e Tres Tesoronan manera un ritual balioso ora cu bo drenta Tao ta un lastima. Hasta tin biaha nos ta lubida nan. Nos no ta realisa cu nos a ricibi e Tesoro Supremo di Universo. 

E reaccion ora di ricibi E Tres Tesoronan.

Awo ta tempo di e Gran salbacion, locual no tawata existi den pasado. Antes un hende mester a perfecciona y cultiva e Merito y Virtudnan prome, pa por ricibi Tao, mientras cu awor, tur esunnan di raiz menor,  di raiz mediano y superior, tur hende, por ricibi Tao.

Cua ta e base spiritual? E ta loke ta determina e reaccion ora cu un hende ricibi e Berdad. Dependiendo di e reaccion ora cu nos ricibi e Tres Tesoronan, asina e tipo di base spiritual di cada hende ta ser revela.

Ricibi Tao ta bolbe bek na nos Origen y tambe bolbe bek na e Tres Tesoronan di nos Esencia.

Ora nos ricibi Tao nos mester bolbe bek na Naturalesa Original. Kiko esaki nifica? Atrabes di e 3 T nos ta drenta den nos Esencia. Den Cristianismo e yama “Trinidad”, den Budismo e ta ser yama Buddha, e Dharma di e Esencia; ora nos actua cu e Tres Tesoronan di nos Esencia ta ser yama bolbe bek, kiermen pensa y actua segun Esencia Budica.

Refugia nos mes, apoya nos mes y confia den nos Origen Universal. Por lo tanto, ricibi Tao ta bolbe bek na Dios, pesey e yama bolbe bek. Pesey e ta e Berdad mas precioso na Mundo pa nos realisa.

BOLBE BEK NA NOS 3 T – A) Kiermen permiti e sernan pa no perde nan mes den e distraicion y deseonan di ilusion. E ta permiti nos cu tin un curpa fisico pa Libera di Sufrimento y obtene Felicidad.

B) Kita e dudanan y compronde e Berdad, transforma mundano pa Sagrado, pa di e forma aki logra Iluminacion. Esaki ta ser yama “ Bolbe bek na e Tres Tesoronan cu Conocemento y Conceptonan Recto”.

Si nos no bolbe bek na e Tres Tesoronan, e Esencia Budico y e Dharma di Curason di e Santonan, nos lo sigui biba na mundo manera e sernan yen di illusion y  confucion, creando mas karma cual ta conduci na reincarnacion enbes di liberacion.

Probecha awor pa asisti na lesnan y na e ceremonia pa e 3 T crece den energia y presencia.

RESUMEN DI E PRECIOSIDAD DI A RICIBI TAO Y E 3 TESORONAN

• E 3 Tesoronan ta pa nos pone nan den practica y pa haya acceso na e virtudnan di nos Esencia; Bondad, Husticia, Cortesia, Fe y Sabiduria. Nan ta e cualidadnan natural di nos Esencia, nan no ta agota, nan ta eterno.

• Nan ta e hermentanan di nos Esencia pa nos actua cu e Berdad pa resolve nos karmanan di Bida.

• Ora cu nos cera nos wowonan 80%, nos ta esun paden cu por observa, esun cu ta scucha, esun cu por papia y por pensa.

• Nos no ta: e pensamentonan, e custumbernan, ni tampoco e emocionnan, ni e recuerdonan, nan ta nos acomulacionnan (memoria).

• E Ego a y ta uza e data aki di nos memoria pa e por influencia y biba nos bida. Pesey e Santonan ta bisa cu nos ta :Preso, Budha ta bisa: pega den e estado di sufrimento, Maestro Jesus ta bisa : Esclavo.

• Pesey nos a haya e bida aki cu ta precioso. Nos bida ta un serie di oportunidad pa tur dia pa nos por humildemente siña, haci cambio pa recupera nos Naturalesa Original.

• Pesey nos mester permiti bida sosode y acepta loke e ta presenta cu Fe, sin pre juicio, keho, of resistencia. E ta nos cosecha di pasado cu tin debe karmico cu ta presenta pa nos siña di dje pa nos por logra libera.

• E Ceremonia diario ta e 3 Tesoronan incorpora den un Ritual cu nos Curpa, Mente y Esencia hunto ta Uni. Asina nos ta fortalece e energia di presencia di nos Esencia. Pa nos ta den nos “Zone” di 100% cu mas constancia.

• P’esey tur dia pone e sonrisa di Budha Mileh riba bo cara, e sonrisa di Fe, di sa ken nos ta y aprecia e Tao ( Bendicion Universal Maximo) cu nos a ricibi nos bida.

• Bida ta e oportunidadnan pa nos crea comiensonan nobo, laga atras pasado y recupera e caminda bek pa nos hogar original. Asina nos lo bolbe biba cu Dios den e Felicidad Berdadero aki na mundo y despues.