E PROME 3 ESTADONAN DI DESPERTA
E proceso di DESPERTA ta un proceso natural cu ta tumando lugar especialmente durante ultimo temponan. Un persona ta cuminsa sinti un cambio di pensamento of un asina yama “Shift” den su mes. Ta manera un comprendemento nobo ta cuminsa surgi, con e ta mira su mes, rond di dje y e Mundo. Boso a sinti esaki?
E desperta di e Espirito di ser humano ta un caminda unico, cada persona ta desperta na un otro manera, pasobra su pasado tambe ta unico y diferente. Pero tin 3 Fase den cual e proceso evolutivo aki ta sosode pa tur persona.
1 - E Espirito den e Estado “Ego State”. Esaki ta e estado caminda Pensamento y Emocion ta Goberna e Ser di e humano; su Espiritu. Esaki ta sosode sin cu e Espiritu di e hende ta consciente. E Ser humano ta identifica su mes fuertemente emocionnan. E Ego pues ta dominando e mente y ta laga poco espacio pa e Espiritu (Ser berdadero) observa su experiencianan. No tin separacion, e mundo externo a integra den e interno = Entangled (enreda/bruha).
2 - E Estado di Confucion of Conflicto cu e Ego ta cuminsa surgi. Esaki ta e fase caminda cu e Ser humano ta bira mas observativo segun e ta ripara e stress den su propio bida y den di otro. Tambe e ta cuminsa tuma nota di hopi sufrimento y inhusticia den mundo. E hende ta cuminsa realisa cu e no, ta di acuerdo cu hopi pensamento y asunto cu cual su Ego ta domin’e.
E ta cuminsa ripara cu e Ego ta influencia y hasta kier dicidi riba su manera di opina y sinti. E ta purba stop e control di e Ego pero no ta facil. E Ser ta purba desasocia di e opinionnan of creencianan di e Ego. E Ser ta cuminsa sinti un conflicto entre E y su Ego y e ta genera un deseo pa libera. Ta aki e buskeda ta cuminsa.
3 - E Estado di Buskeda. Esaki ta e fase caminda cu e Ser humano ta cuminsa busca informacion pa haya sa mas di kiko ta e Berdad di bida, e kier haya sa kiko e no sa. E ta cuminsa rondia bukinan of website cu tin informacion tocante e realidad di bida y ken realmente E ta? Hopi ta recuri na busca literatura spiritual di antiguedad, e kier haya sa; pakiko e a nace, significado di bida y unda destino ta hiba nos tur. E kier haya sa, si tin un Dios y su significado. Durante e periodo aki hende ta cuminsa experimenta cu meditacion, etc. Ta surgi un “Inner urge” (urgencia interno) pa comprencion mas eleva. Hende su gana di haya sa ta expande su capacidad pa absorba informacion tocante su mes, bida y Universo. E Ser humano su buskeda ta trec’e na Tao.
Informacion di Tao; bo ta haya sa, cu cada humano tin un Ser y cu e Ser aki tin un luz cu Dios a percura pa crea nos tur cu ne.
Bo ta haya sa cu e Luz aki tin forsa di energia di e Berdad y Sabiduria di bida pa mira tur cos cu Claridad. Den Tao ta wordo splica cu unabes cu e forsa di e lus aki wordo reactiva e por cuminsa haya forsa di Presencia.
Bo lo wordo informa cu nos ta bibando e periodo cu yama “White Yang Period”, Periodo di Revelacion, of Tercer Periodo (e di Tres Periodo). Esaki ta e Periodo cu tur hende cu ta desea, por haya sa e Secretonan di Shelo y di Bida.
Y si e desea di ricibi Tao, e por conoce e 3 Tesoronan cu Shelo ta pone disponible pa e hende por fortalece su Luz diariamente pa e por uza den su bida diario pa maneha su situacionnan y remove e capanan di e Ego cu ta blokea su luz pa asina e por gradualmente libera y después Ilumina.